يقول من عدى
يقول من عدى على راس عالي
رجم طويل يدهله كل قرناس
في راس مرجوم عسيرالمنالي
تلعبه الأرياح مع كل نسناس
في مهمه قفر من الناس خالي
يشتاق له من حس في القلب هوجاس
قعت في راســـه وحيــد لحــالي
كأني براس الرجم مذبوح بالرأس
متذكر في مرقبي وش جرالي
وصفقت في الكفين يأس على يأس
أخــذت أعد أيامها والليالي
دنيا تقلب ما عرفنا لها قياس
كم فرقت ما بين غالي وغالي
لو شفت منها ربح ترجع للافلاس
يقطعك دنيا ما لها أول وتالي
لو أضحكت للغبن تقرع بالاجراس
المستريح اللي من العقل خالي
ما هو بلجات الهواجيس غطاس
ما هو بمثلي مشكلاته جلالي
أزريت أسجلهن بحبر وقرطاس
حملي ثقيل وشايله بحتمالي
واصبر على مر الليالي والاتعاس
وأرسي كما ترسي رواس الجبال
ولا يشتكي ضلع عليها القدم داس
لا خاب ظني بالرفيق الموالي
مالي مشاريه على نادي الناس
لعل قصر ما يجيله ظلالي
ينهد من عالي مبانيه للساس
والبوم في تالي هدامه يلالي
جزاك يا قصر الخنا وكر الادناس
لا صار ما هو مدهلا للرجالي
وملجاء لمن هو يشكي الظيم والباس
حسناك يا منشي حقوق الخيالي
يا خالق أجناس ويا مفني أجناس
متى تربع دارنا والمفالي
تخضر فياض عقب ما هي بيباس
ونشوف فيه الديدحان متوالي
مثل الرعاف بالخصر مدقوق الالعاس
ينثر على البيداء سواة الزوالي
يشرق حمارة شرقة الصبغ بالكاس
كلمات: محمد الاحمد السديري
ألحان: محمد عبده
ليست هناك تعليقات:
إرسال تعليق