الشاعر / طماش دخيل السويدي ...
يا لله ياللي ترحم الحال وتخيف=
يالواحد المعبود منشي المخيله
يالله يامنشي مزونٍ مراديف=
بدر لنا بالغيث وعجل بسيله
عقب المحل تملاء بلادك من الريف=
يارازق العمياء الدروج الهزيله
اطلبك انا يامصرف الرزق تصريف=
يامدبر الدنيا نهاره وليله
تجعل لنا عرضٍ نقيٍ عن الحيف=
يالله يامعطي العطايا الجزيله
قم ياسعدقلط دلالٍ مهاديف=
والنار شبه من هشيم الخميله
كبر ضواه وطرف الجمر تطريف=
واركه على جمرٍ عقاب الشعيله
احمس وذرف حمسة البن تذريف=
واحرص على تزيينها وتعجيله
نضف مشاربها بعد واغسل الليف=
ويجوز لو حطيت عودٍ بهيله
الرزق عند الله وسيع المحاريف=
المعتلي محيي الرياض المحيله
لابد ماتركا علينا الكراشيف=
العمر مرهونٍسوات العديله
من جاك رحبه بلينٍ وتلاطيف
ومن جنبك خله يروح بسبيله
وقلل كلامك لاتطيع المزاهيف=
يكفي من الهرج الصمايل قليله
كثر الكلام يكلف النفس تكليف=
واحذر عوين ابليس راع النقيله
احرص بدينك واترك الحسد والحيف=
واياك ترك السبب وتعطيله
وبين العرب ترى كثير التواقيف=
لابد ماترمى عليه الفشيله
والعقل وفه من عقول المعاريف=
واحرص على زين النبأوتعديله
ولاتامن الدنيا ترى به صواديف=
كفاك شر مغطياته وميله
والوالدين احرص عليهم بتشريف=
اوصابهم ربك بمحكم دليله
والجار مقرونٍ وقاره مع الضيف=
واللي يجيك لحاجةٍ تنتبيله
واياك لاتسمع لبعض السواليف=
واحفظ سمين الهرج واترك هزيله
وتر الشريف يوصف الطبع توصيف=
ان الرجل يعرف بسمعة خليله
ولاترافق إلا من يونس الياشيف=
اللي على الجيران يضفي شليله
الحر ينزل نابيات المشاريف=
ويشفق على العليا وراس الطويله
والبوم واجناسه عفون الدناديف=
كلٍ من الأجناس يلقى خليله
وصلاة ربي عد مابارقٍ شيف=
على نبيٍ وضح الله دليله
ليست هناك تعليقات:
إرسال تعليق