دخيل خذ من والدك لك مساله
مسالةٍ مايفهمه كل رجال
احشم خويك عن دروب الرزاله
ترا الخوي عند الأجاويد له حال
المرجلة بالك وترخي حباله
حذرا تعيل ولا تراخى لمن عال
البل يفتل من وبرها عقاله
والخيل تزلج بالشبيلي والأقفال
كان انت ماتدعى على كل قاله
تراك من حسبة هدومٍ له ازوال
وان كان دلوك ماتموحه شماله
تر النشاما يطوحونه على الجال
ورفيقك الداني ليا شفت حاله
احمل عليك من المعاليق ماشال
ياعل رجلٍ شوفته قد حاله
عسى تدور زوجته فيه الابدال
الحمرة تدرك معيشة عياله
ولو كان مايبغى منه باق الاحوال
وان صار لك من عوص الأنضا زماله
حمرا تورد بك ليا صنقر اللال
تمرس كما تمرس خطاة المحاله
مع سهلةٍعمال من جاء معه ذال
خله مع الديان تمشي لحاله
يا صار منت للمسة الخشم حمال
تر ربع يومٍ مقعدك بالشكاله
يسوى حياتٍ عايشينٍ به انذال
…..
قالوا تسير قلت مامن فضى بال
وقتٍ على الاجواد مابه وناسه
قم سو ياراع المعاميل فنجال
كثر بهار الهيل يغدي عماسه
هذا زمانٍ مقبلٍ منه انا ذال
ناسٍ كلت ناسٍ بخبث ونجاسه
قامت بصاع المنكر الناس تكتال
ودلت تياع الجوهرة بالنحاسه
واشوف انا الأسُوْد خشع وذلال
وقتٍ به الحصني يدور الفراسه
وراع الجحش شرهٍ على جدع خيال
متحيزمٍ فوقه بدرعٍ وطاسه
ولباسة الجوخ الحمر وادهم الشال
صارت تغولهم عيال البساسه
ما ينتعدل شيل بقعاء ليا مال
ومنين ما عدلتها ما تواسه
يارعي الخصرين والطوق وهلال
اللي شفاتينه سواة اللعاسه
اصبر وعند الله تصاريف الاحوال
والقصر مرجاعه على بني ساسه
