ورقة قديمة
نعم الرفيق
الله من قلب دبل كبد راعيه
قام يتدرق مثل شمس المراتي
ما يرعوي للنصح من دون طاريه
ليا ما غدا بين الحذا والصفاتي
ارجع واهون وافتكر في مواضيه
وليا الحسايف ما ترد الفواتي
كم واحد يطرف عيونه بياديه
ويفارق الغالي على ادنى حكاتي
عزي لمن عمره مضى في تمنيه
ما همه إلا قول: ويش السواتي؟
يا قلب ذا وقت عسى الله يمضيه
ويا راكب اللي تقل فزة قطاتي
حر هميم للوازم معفيه
عليه من يدي علوم الثباتي
يلفي على خل ولا نيب كاميه
صحيبي اللي ينطح الملزماتي
هو شوق من كن العسل بين اشافيه
اللي قرونه بالحجب شارعاتي
فيا راكبه لي جيت لي عند ناصيه
الليث (أبو صالح) عطيب الرماتي
تلفي على اللي دايم القلب يطريه
حيث ان ما غيره رفيق ثباتي
سلام مشتاق ليا شاف غاليه
به اختلط حبل الرجا والمماتي
فان قال كيف اللي علينا حواليه
قل له رفيقك ساهر ما يباتي
متحير ما عنده أحد يشاكيه
إلا صديق مثل وصف العداتي
هذا زمان كاثرات بلاويه
ماله من الحيلات كود السكاتي
فان كان تالي العمر جا مثل ماضيه
باعنك ما تسوى ريال حياتي!
ضاري بن فهيد الرشيد
ليست هناك تعليقات:
إرسال تعليق