قصيدة ( خلك جبل ثابت ) الشاعر تركي عواد
لا صرت مؤمن بالعسر والتياسير ... وعينك بعين الله ما يكسرونك
ولو سكروا بيبانهم بالمسامير ... بيبان ربي ما تسكر لعونك
وقف ولا تهزك رياح المقادير ... واضحك كثر ما حاولوا يحرجونك
ولا تطيح في وجه الليالي المعاسير ... في ذمتي لا طحت ما يرحمونك
خلك جبل ثابت بوجه الأعاصير ... وللغانمة اسبق قبل يسبقونك
الناس لو بيدينها الرزق والخير ... تشوف حتى من النفس يقطعونك
ولو ضحكتك بيدينهم يمكن كثير ... حتى على ضحكتك يب يحسدونك
ما ينوكل لحم الاوادم ولا يصير ... ومن اتهيا طيحتك ياكلونك
قطعة خشب لا تصير بيد المناشير ... والله باقرب فرصة يحرقونك
ولا تحسب نفوس المريضة مذاخير ... الذخر والله من يطيحون دونك
اشتري فراق اهل الردى بالدنانير ... لو تنقص أموالك وتكثر ديونك
ولا تتعب أقدامك بكثر المشاوير ... وانت بقفاك تعرف ما يشتهونك
ما جوك يوم ان المصايب طوابير ... والحين لا ضاقت عليهم يجونك
لا تصير ويا الناس مثل الاصنصير ... تشيلهم واليا صعدوا ما يبونك
قرب من الطيبين من دون تفكير ... وابعد عن عفون العرب لا يعدونك
ربع المصالح لو تكثر مســـايــير ... لا خلّصت حاجتهم يتركونك
ربع الوفا لو هم قليلين بس غير ... لو تنشرى بأعمارهم يشترونك
خطالك عند اللي يحبونك صغير ... قبل اتعذر عندهم يعذرونك
والي يبغضك لو تنفرش القاع نويّر ... ادناه غلطة بحقهم يفضحونك
ليست هناك تعليقات:
إرسال تعليق