محمد بن شلاح ثنتين عنهن ما تجوز المعاذير

 https://youtu.be/3BIzLbGPmwE

من اجمل ماقاله الشاعر محمد بن شلاّح المطيري رحمة الله عليه قصيدة فيالحكمة قال فيها .

ثنتين عنهن ما تجوز المعاذير …
سترك لاهل بيتك ومكسب يمينك

وثنتين لو طال الزمن ما بهن خير …
هرج القفا ومجاملة من يهينك

وثنتين يطلقن الوجيه المسافير …
ترديد ترحيبك وضحكة جبينك

وثنتين يسوون التعب والمشاوير …
مواصل ارحامك وفزعة قرينك

وثنتين نار وعار معنى وتفسير …
ترضى الخنا وتخون مستأمنينك

وثنتين لا تقبل بهن الاشاوير …
الجار والصاحب ليا قال وينك ؟

وثنتين يشرن بالذهب والدنانير …
حشمة بني عمك ونصرة عوينك

وثنتين جنبهن واحذرك تحذير …
فعلٍ يشنّع بك وهرجٍ يدينك

الشاعر الكبير محمد بن شلاح المطيري- رحمه الله-.. من أشهر مؤسسي برنامج من البادية الذي كان يذاع من إذاعة جدة.. خدم هذا الشاعر الموروث أكثر من أربعة عقود من الزمن اتصف رحمه الله بالعديد من الصفات النبيلة ومن أهمها الكرم وإصلاح ذات البين ومساعدة المحتاج بقدر ما يستطيع لهذا الشاعر العديد من القصائد التي توضح لكم ما ذكر عنه..

فمن قصيدة (الوجار) التي لايخفى على الجميع قصتها التي اشتهر بها ابن شلاح نختار منها قوله:-

امل الوجار وخلو الباب مفتوح

خوف المسير يستحي ما ينادي

نبغي اليا جا نازح الدار ملفوح

وشاف البيوت مصككه جاك بادي

يقلط بديوانٍ به الصدر مشروح

ورزقه على رازق ضعاف الجرادي

ومن قصيدة أخرى يسندها إلى ابنه الشيخ عقاب نختار منها قوله:-

يا عقاب ما والله نوينا على الشين

واللي نوى بالشين ربي يعوقه

ويا عقاب لو انا فارا مقلين

كم مسلمٍ مظلوم نظهر حقوقه

ونصبر لحساد الاقاصي والادنين

لو الحسد مر على من يذوقه

ومن قصيدة (وسوم الانذال) نختار قوله:-

ياليت فيه وسوم تعرف للانذال

حتى نعرف النذل ونكب جاله

لكن عمت من لبس ثوب رجال

وكل تسمى بالشرف والرجاله

وكل يقول افلان وافلان بطال

يبدي عيوب الناس ماشاف حاله

وبالناس جهالٍ وبالناس عقال

لكن منهو اللي يقر الجهاله

ولاكل من قاد الجماميل جمال

ولاكل تاجر يقنعه راس ماله

لكن احد يركض ورا القرش وريال

جماع مال ولاحسب للجماله

واحدٍ ليا منه كسب يرخص المال

من دون وجهه ماتحوشه سباله

ومن قصيدة (شليويح) التي يسندها على أخيه الشاعر الكبير شليويح بن شلاح نختار منها قوله:-

وقتٍ تقافا وانتهى ياشليويح

ما عاد يصلح للوجيه السميحه

دنيا بحر والناس فيها سبابيح

ومن طاح ماهم ابن عمه مطيحه

احدٍ يبي من عيشها هبة الريح

ماهو مدور من وراها مديحه

ينصاه من يبغى الدلال المدابيح

وينصونه اللي مشتهين الذبيحه

وينصاه من يبغى قبال المفاليح

يلقى السوالف والعلوم المريحه

ومن قصيدة (ان شاب راسي) نختار قوله:

ان شاب راسي هالزمان اعذروني

ما ينعذر راس البنادم اليا شاب

الشيب من شي تشوفه اعيوني

هذا صحيح القول ماني بكذاب

ماني من اللي بالردا يركضوني

ولاني اليا شفت السمارات نصاب

انا الذي افرح اذا جالسوني

خص ليا صار المسايير شياب

ادهل مجالسهم وهم يدهلوني

وليا نصوني مادرق من ورا الباب

إلى أن قال فيها:-

كم واحدٍ يضحك لمن يضحكوني

يحسب الصحبة على ضحكة الناب

مايدري ان الضحك شي يهوني

العلم من يفزع بوقت ام غصاب

ولو كان كل اصحابنا ينفعوني

كان اغتنينا من كثر عد الاصحاب

لاشك عند اللازمه ينقصوني

ماكل من قال اركب الخيل ركاب

ومن قصيدة طويلة تتصف بالحكوة نختار منها قوله:-

لو كلنا في وقتنا طول بعضنا

ما كان صارت نفس تدرك مرامها

ولكن فينا عن بعضنا تفاوت

عيشة قفار وتصير الاخرى يدامها

كل رجل فالدنيا يفكر ويفتكر

ويذكر محاسنها ويذكر ملامها

وهذه من أبيات الحكمة أيضا حيث يقول:

ماكل طير يطرد الصيد يشفيك

ولاكل سيفٍ ضربته تقطع الراس

وماكل من يقرأ الكتابه يقريك

ولاكل من يبن البنايه على ساس

وأخيراً هذين البيتين لشاعرنا رحمه الله التي يوجهه لمن يغتر في الدنيا حيث يقول:

ان كان تضحك معجبك كبر دنياك

ولها بقلبك صار حبٍ كبيري

اذكر اليا قفيت عنها وشلناك

ولقيت مثواك الأكيد الاخيري

رحم الله شاعرنا وأموات المسلمين، وإلى اللقاء مع مقتطفات لشاعر آخر.. ولكم تحاتي،،،

زهران عون الله المطيري - بريدة