يا شن بقلبي منه صبحت مكضوم
يعلم به اللي عن عباده غناوي
وعيني يابو ماجد حريب لها النوم
وكنه يعالجها الطبيب المداوي
شوف البغيض ينونها عمس وهزوم
والقلب ناشه بالمعاليق لاوي
ونا إلى جاني من الناس مزحوم
احل عنه الكايدات الدعاوي
ارخص له النفس العزيزه بلاسوم
ونا على فعل الجمايل رهاوي
وعديت من ور العناراس مزموم
في راس مرقاب جديد المطاوي
رجم طويل نايف كل مرجوم
مهايف راسه عسير المهاوي
وهيضت من وسطا الحشا كل مكتوم
زفرات ما يقوى لهن كل قاوي
وانا بعون الله ولو كنت مظلوم
لكسب المعالي بالشدايد مهاوي
ارومها لو دونها حرب وسهوم
وياما حوينا بالشدايد محاوي
عساك يللي تنقل الكبر والزوم
من المرض تصلي بحر المكاوي
انا الوحيد وقومي اكثر من الروم
وفي لمة العربان كني خلاوي
وحتى صديقي صار من حسبة القوم
وضاعت عزوم مكثرين العزاوي
ودعيت عفن الريش يوم ادرج الحوم
ابالرخم ونا احسبنه نداوي
طير بحزات الهدد يلحقه لوم
اللي نقص به ضايع الفكر غاوي
خسران والخسران من ينقل البوم
يبشر بخيبات الرجا والبلاوي
الناس في دنياك معطي ومحروم
وكلاً على طيب المعاني شفاوي
الطيب لاهل الطيب والرزق مقسوم
وطير السعد طير تعدى الحراوي
طير نقلته طالني منه مثلوم
وبعض الطيور يضيعن الهقاوي
انا احسبنه صاطي القلب ملحوم
وثره عن الصيدات مثل العماوي
من المذله بارد الوجه ماسوم
وقلبه على درب الرذيله نحاوي
هقيت به لاشك اناصرت منجوم
وتوي دريت اني عن الدرب غاوي
من خلق في دنياه بالفعل مذموم
على الردا بالحيل مشيه نحاوي
الله لا يسقيك يالواد ابو دوم
وعساك صحصاح بك الذيب عاوي
خمسين عام ما يقولون ما سوم
يصحى سماك وكل ما فيك خاوي
يجيبك ماجا قوم صالح من الشوم
والبوم باركانك يجر الحداوي
يالله يا معبود يا فارض الصوم
تقبل دعات اللي بجودك رجاوي
موحد يطلبك في ثاني التوم
يرجى العفو وارضاك وامرك سماوي
من خلقت الدنيا الى يومنا اليوم
صبح يفوت وليل يقفاه ضاوي
والناس تفني بين مذنب ومرحوم
وهنيت من له عند ربه عراوي
