يامتعب الأقدام ماشي على ويـن ؟؟؟؟ !!!~

يامتعب الأقدام ماشي على ويـن ... مع جرّة جاها العجـاج ودفنهـا

ارجع وعدّ خطاك وحده وثنتيـن ... واكبح جماح النفس والزم رسنهـا

لاتامن الدنيا ترى وضعها شيـن ... ماعاد به دنيـا صحيـح بدنهـا

لاصاروا العقّال مثـل المجانيـن ... واصبح ردي العرف يامر وينهى

انا مجرّب والتجـارب براهيـن ... اراهن الأيـام واكسـب رهنهـا

منها عرفت الفرق بين الفريقيـن ... سبحان من صاغ العقول ووزنها

وان كان صح ان التجارب براهين ... ضمنتها لن كان ربـي ضمنهـا

رفقة ردي المعرفة بعتهـا ديـن ... على زبون " ضمّها واحتضنهـا

بغى يجيني بالثمن قلـت بعديـن ... امسك فلوسك لين ننشـدك عنهـا

مابعتك الاّ سلعة" يااحمر العيـن ... ابيعهـا وابيـع حتـى ثمنـهـا

والله مبي فيها ثمن لـو قرشيـن ... بس المهم انـي تخلصـت منهـا



رشيد الزلامي

قصيدة عزاء في الأمير نايف

قصيدة رثى وعزاء في وفاة صاحب السمو الملكي
ولي العهد الأمير نايف بن عبد العزيز رحمه الله



جــانــا خبر منقول عبر القنوات
…………. ينعــى الأمير اللي كريمٍ محياه
مرحــوم يا نايف زعيم الصعيبات
………… يا الله عسى في جنة الخلد مثــواه
مرحــوم يا ناصي كبار المهمات
………… يــوم الوغاء كلٍ يبا الغوث ينخاه
وأعزي القادة ترى العز مـا فـات
………… علــى عــزيزٍ راح حنـا فقــدنـاه
يا نعم أبـو متعب رعاء للمروات
…………. هــو الخلف ينهض ليا ما نخيناه
حنا عــزانا فى الذي حي مامات
………… يخلــف لنا نايف بمثله وشــرواه
والخير باقــي مــا علينا ختــلات
………… محمــد النايف نعــم وأن نصيناه
الـــله يجبر خــاطــره بالكرامــات
…………. ويسلـــم ويغنــم كلنا من فداياه
شعب الوطن واحد ولابه خلافات
……….. مـــوحـــدين ورايــة العـز ترعــاه
والدين واحد والنتيجــه سلامات
………… والعــهــد الأول كلنـا مـا نسيناه
وصلات ربـي عد رمــل الحصوات
……….. على نبـي الحق حنا سمعنــاه

شعر / مسعد المطيري

العبرة بالفعل

أن العبرة بما يفعله الأنسان
ليس بما يقوله والعرب تقول
الحرب هيلمه. أن كل ما يقال
هو زوبعة في فنجال مالم نرى
النتيجة أمام أعيننا والعمل أحد
أمرين أما زيادة أصلاح صالح
أو أصلاح فاسد والسير به في طريق
الصلاح. . أما غيرهما فلا عبرة به
مسعد المطيري

قصيدة. اللي يجينا ضيف

---

اللي يجينا ضيف نفـــرش له الزل
……. ويــا مرحبا مليون بأهل المواجيب
حيـا اللـــه اللي جاء وفي بيتنا حل
……. يبشـــر بفنجالٍ نصبه على الطيب
مــا ضـــاقت الدنيـــا ولا ضيفنا مل
……. الضيــف ضيف الله بحسب المكاتيب
سلـــم العرب تذبح لضيفــانها البل
……. واليوم نخطيء في المواجيب ونصيب
هذا الزمن صـــاب العرب علهم عل
……. لكـــن شجعان العرب ما بهم عيب
كــل يقــوم بـــواجبـــه دوم مــاذل
……. شبـــابهم والا الذي غطــه الشيب
مشـــكور ياللي قيّس الجود بالمل
…… وارد حياض الموت يوم الخطر هيب
مــكرم سبال الضيف بالجود ما كل
…… وجهـــه طليـــق ويغمره بالتراحيب

شعر مسعد المطيري

قصيدة . البنت

البنت بنت ( مطير) خيرالبناتي
بنت الأصول اللي لها كل تقدير

عــدوها نسقيه ســمَ السعاتــي
نقضي عليه ولا يجيي فيه تقرير

ما دنست في عرضها بالحياتي
ولا همها كثر السفر والمشاوير

ومحصنــه بالعز ضد العداتــي
ما حسبت لأهل الردى والتثاوير

ورجالها ما قال ويش السواتي
من طيبها ترعى عياله بتدبير

ما به خلاف ولا يجيهم شتاتي
ومدبره ما خسرت بالفــواتير

ومطير فيهم خير ربعي عزاتي
و وجيههم بين القبايل مسافير

وأن عاهدوا يوفون شئياً ثباتي
قول صحيح ولا نبي فيه تبرير

مسعد المطيري 20/2/2014

قصيدة . يامتعب نفسه

يامتعب نفسه على غير مصلوح
...... النفس خالــف رايــها فـي غضبها
خلك كريم الوجه والصدر مشروح
...... وأبعــد عــن اللي كــل كبد دبلها
مر الجواب ودوم فالناس مفضوح
...... ياتي بكلمه مــا عــرفنــا سببهـا
متوســط بين العرب كنــه اللــوح
...... دايــم بغيض وكلمته ما حسبهــا
وعليك باللي خـوته تنعش الروح
...... من ربعــة بالحيل غالي نسبهــا
يعطيــك فكــره غاليه كلهــا بوح
...... وتبعد عن اللي باقية في نشبها

شعر مسعد المطيري

قصيدة . وش هقوتك

وش هقوتك باللي سرى تالي الليل = مـتـنحــرٍ درب الـمهـالك الـحـالـه

يوم انهـا كـثـرة عـلـيـه الغـرابـيـل = والصدر ضاق وخبث الوقت باله

وضاقت به الدنيا ولاعـاد به حـيـل = وزاد الحزن والقلب زاد اعـتلاله

حمل فـراشه والعـزب والمعـامـيـل = واركى على جيبٍ يسابق اظـلاله

يبي ديارٍ أمـس قـالـوا بهـا سـيــل = يبي نـفــودٍ حـايـر الـمـاء بجـالـه

يبي يتعـلى عـله يشـاهـد اسهـيــل = يـبـي يـنـادم كــل نـجــمٍ بــدالــــه

ويبي يولِع مـثـل نـار الـمحـافـيــل = في راس طعـسٍ يتعِب اللي رقالـه

ويبي يبهـر دلته باخـضـر الـهـيـل = ويبي يـفـوح فـوق الارطـى دلالـه

ويبي يغـني بالـلحـن والـمواويــل = ويبي يبـدد بالـصـحـاري اهـبـالــه

وإلى صفى راسه بـدا بالـتهـالـيـل = وسبح بحـمد الله وخـلـى الجهالـه

ولا احـدٍ معه يفك الاطناب ويشيل = ولا احـدٍ يـزود بالرحيـل انـفعـالـه

لطاب شفه من هـوى البر بالحيـل = يرحـل على كيفه متـى ما طـرالـه

ياكـثـر مانـبغى ولامـن محـاصـيـل = ماكـل مـن يـبـغـى لـشـيٍ يـنـالـــه

هـذي أمانـي والامانـي تـعـالــيـــل = تـسـلى بهـا نـفـسٍ تعـثـر مـنـالـه

احمد بن عبدالرحمن العريفي
(نديم المجره)