يقول مشعان الهتيمي تفلهم
قافٍ نهض بين الضلوع المغاليق(1)
قافٍ حلا من در عفراً ترزم
لا رايعو لوليدها بالتفاهيق(2)
لا روحة من خايعٍ فيه خمخم
ومخالطٍ نبت الشقارا زماليق(3)
في صاحبٍ من دونه الطير حايم
دونه سراب القيض جاله تباريق(4)
ريقه حلا من در بكرٍ ترزم
ولا محاقن سكرٍ في صناديق(5)
ليته سقاني من شقاياه يا عم
من مبسمٍ ما اشوفه الا تراميق(6)
من مبسمٍ زاهيه لبس الزميم
عليه من فوق الزميم عشاريق(7)
ابو ثليلٍ ٍ ياصلن المحزم
يشرب به العطشان من ما ابريريق(8)
لا جت انا وصويحبي بنتلايم
بيني وبينه نيهو بالتفاريق(9)
غدوا به اللي جعلهم للثلايم
وقفوا مع الديان بذويبل الريق(10)
ياعم انا بشكي عليك الهضايم
انتم ذبحتوني على غير تحقيق(11)
خلي طواني طية الثوب ابو كم
وأنا طويته مثل بير المرازيق(12)
طواني طي ثياب قزٍ اتخدم
اللي تخيط بالسلوك الملابيق(13)
ترحلوا يبغون تين ويبا يم
يم الغروس اللي ثمرهن مداليق(14)
عساه يزي دارهم يوم نلتم
يزي وطن اهل القلوب المشافيق(15)
من دونهم ما يتعب الذيب الاسحم
خدٍ بعيدٍ للمها به طواريق(16)
ما ياصله يا كود هجنٍ تدرهم
شيب المحاقب زاهيات المعاليق(17)
الله على اللي لا عدا بي اينسم
يشدي غزال ٍ طاردينه سلاليق(18)
وانهب عشيري في دجى الليل الاظلم
واطفي لهب نارٍ صلت للمعاليق(19)
وازبن بها ضلعٍ منيعٍ اململم
حيدٍ طويل ولا بخده طواريق(20)
مني على المختار اصلي واسلم
ما ناح ورقٍ بالغصون المواريق(21)
الشاعر:
هو مشعان الهتيمي من شعراء القرن الثالث عشر الهجري ولم يدون له سوىقصيدتين هذه إحداهما.
القصيدة الثانية
يامن لقلب سج في مربعه لج
لجلاج أهل سوق تبيع الكساوي
لجة محال البيريوم يتدارج
تقبل وتقفي به ثلاث عداوي
سواقها (...) إليا قام ينهج
(...) حلال القوم ماهوب ياوي
عديت في عالي الطويل المدملج
في راس مرقاب يهيض الهواوي
وبدعت قاف فاهمه ماتعروج
وكل على قاف الهتيمي شفاوي
يشدي لدر اللي ولدها يدرج
إليا جات من نبت الشعيب الفراوي
إليا جات من واد بنبت النفل عج
وسقاه من نو الثريا مهاوي
واللّه لولا يوم أضيق أتهلج
لعوي عوى ذيب حدوه الشواوي
لعوي عوى ذيب على المرح دوج
وطاويه من قد له من الجوع طاوي
عليك ياراعي الجبين المدعج
ومبيسم يمصع ضمير الهواوي
ياعود ريحان عليه المدي دج
عليه عباب الركيه نحاوي
عليه عباب الركيه تسهرج
سهراج ركب مبعدين الهقاوي
وجدي عليهم وجد من طاح في العج
وتسابقوه موردين الأهاوي
والا وجود اللي رمنه ورافج
خلنه العيرات في الليل غاوي
يبي مكان الجيش والجيش قد هج
وظلا تصفقه الروابع خلاوي
مادونهم ياخريص من قاع أبلج
ومن سهلة فيها الأدام متخاوي
ماياصله ياكود حمرا من السج
باق عليها من شحمها شلاوي
مبرية الذرعان وعضودها فج
سهل قراها للرديف متساوي
ومن لامني في حبهم جعل يهدج
بمشلشل عوده طويل رهاوي
بمشلشل مافيه تكعيب وعوج
سمح القنامع ساقه الجب هاوي
رحم اللّه مشعان الهتيمي فقد كان كوكبا في سماء الشعر ورحم اللّه الشيخ سعد بن جنيدل فلم أجد ضالتي بعد بحثي الطويل عن أخبار هذا الشاعر وشعره غير في كتابه شعراء العالية من أعلام الأدب الشعبي فنقلتها لكم وبشيء من التصرف مع التقدير والاحترام.
عبدالعزيز بن محمد اليحيان
